ایم ایس کارڈیالوجی‘ڈاکٹرزکے ناروارویے کیخلاف نرسوں کا احتجاجی مظاہرہ

ملتان(سپیشل رپورٹر) ایم ایس کارڈیالوجی اور ڈاکٹرز کے ناروا رویے کے خلاف نرسوں نے ایمر جنسی کے سامنے احتجاجی مظاہرہ کیا ، ہسپتال انتظامیہ نے نرسوں کا مظاہرہ ختم کرانے کے لیئے پولیس طلب کر لی ، کارڈیالوجی ہسپتال انتظامیہ نے ہتک آمیز رویہ رکھا تو ہسپتال میں غیر معینہ مدت تک ہڑتال کر دیں گے ، ینگ نرسز تفصیل کے مطابق ایم ایس کارڈیالوجی ڈاکٹر فہیم لابر ، ڈی ایم ایس ڈاکٹر فرحان اور دیگر ڈاکٹرز کے ناروا رویے ، بد تمیزی ، گالم گلوچ کرنے پر نرسز نے گزشتہ روز ایمر جنسی کے سامنے احتجاجی مظاہرہ کیا ، جس میں نرسز کی بڑی تعداد نے شرکت کی ، اس موقع پر نرسز نے ایم ایس ڈاکٹر فہیم لابر ، ڈاکٹر فرحان اور دیگر ڈاکٹرز کے خلاف شدید نعرے بازی بھی کی ، احتجاجی نرسز کا کہنا تھا کہ ایم ایس اور چہیتے ڈاکٹرز ہسپتال میں من مانیاں کر رہے ہیں ، ڈاکٹروں کے خلاف آواز اٹھانے والی پانچ نرسوں کو سیکرٹری صحت کی صوابدید پر بھیجنے کی تیاریاں کرنا شروع کردیں ہیں جس پر وہ سراپا احتجاج ہیں ، نرسوں کا احتجاج ختم کرانے کے لیئے ہسپتال انتظامیہ نے پولیس طلب کر لی ، جس پر لیڈی پولیس اہلکاروں سمیت پولیس کی بھاری نفری ہسپتال پہنچی جنہوں نے نرسز کا احتجاج ختم کرانے کے لیئے کوشش کی ، اس موقع پر ینگ نرسز کا کہنا تھا کہ ایم ایس سمیت ان کے چہیتے ڈاکٹرز کا نرسوں کے ساتھ رویہ انتہائی ہتکآمیز ہے ، اگر ان کے مطالبات نا مانے گئے تو وہ جنوبی پنجاب بھر کے ہسپتال میں غیر معینہ مدت تک احتجاج کی کال دے دیں گی ، جس کے بعد مریضوں کی مشکلات کا ذمہ دار ایم ایس اور اس کے چہیتے ڈاکٹرز ہوں گے