کاہنہ فیروز والہ قصور میں حادثات 2دوستوں2بہنوں سمیت 7جاں بحق

 کاہنہ+قصور+شیخوپورہ، جوئیانوالہ+ فیروزوالہ (نامہ نگاران+ نمائندگان نوائے وقت)کاہنہ ٹرک کی ٹکر سے موٹر سائیکل سوار دو دوست موقع پر جاں بحق ہو گئے ٹرک ڈرائیور فرار جبکہ قصور کے نواح حسین خانوالہ میں دوموٹر سائیکلوں کے تصادم میں دو افراد جاںبحق ہوگئے۔ ادھر شرقپور روڈ اور جی ٹی روڈ پر ٹریفک  کے دو مختلف حادثات میں دو سگی بہنوں سمیت تین خواتین جا ں بحق4نوجوان زخمی ہوگئے۔تفصیلات کے مطابق کاہنہ مدینہ ٹاؤن کے رہائشی دو دوست عاطف اور سنی موٹرسائیکل پر قصور سے اپنے گھر آرہے تھے کہ پرانا کاہنہ کے قریب  تیز رفتار ٹرک نے انہیں کچل ڈالا جس سے دونوں دوست موقع پر جاں بحق ہو گئے اور ٹرک ڈرائیور موقع سے فرار ہو گیا۔ ادھر قصور میں شہزاد اپنی موٹر سائیکل پر جارہا تھا کہ حسین خانوالہ کے قریب سامنے سے آنے والا بلال تیزرفتاری کے باعث ٹکرا گیا، شہزاد موقع پرہی دم توڑ گیا جبکہ بلال ہسپتال میں دوران علاج دم توڑ گیا ۔ادھر لاہور شرقپور روڈ کی آبادی قلعہ غوث تریڈے والی کے رہائشی زمیندار شرافت علی کا بیٹا صداقت علی 20 سالہ اپنی دو بہنوں عائشہ اور ایمان شرافت 9سالہ کے ہمراہ موٹر سائیکل پر سوار ہو کر شرقپور جا رہے تھے جب وہ راستے میں پہنچے تو پیچھے سے آنے والے ٹریکٹر ٹرالی نے انہیں ٹکر مار دی جس کے نتیجے میں عائشہ شرافت اور ایمان شرافت جاں بحق ہو گئے جبکہ ان کا بھائی صداقت علی زخمی ہوگیا اسے طبی امداد کیلئے ہسپتال کر دیا گیا، حادثہ کے بعد ڈرائیور ٹریکٹر چھوڑ کر فرار ہو گیا پولیس شرقپور نے مقدمہ درج کرلیا۔ جی ٹی روڈ کی آبادی دیردا موڑ کے قریب تیز رفتار بس نے موٹر سائیکل سوار ماں بیٹے کو ٹکر مار دی جس کے نتیجہ میں شہناز بی بی ہلاک اس کا بیٹا شدید زخمی ہوگیا جسے طبی امداد کیلئے ہسپتال منتقل کیا، کالا خطائی روڈ پر رکشہ الٹنے سے 3 افراد زخمی ہوگیا۔