لاہور (سپورٹس رپورٹر)پاکستان کرکٹ بورڈ نے پاکستان سپر لیگ 6 کے ابوظہبی میں شیڈول بقیہ 20 میچز کیلئے میچ آفیشلز کا اعلان کردیا ہے۔ یہ میچز 9 سے 24 جون تک شیخ زید کرکٹ سٹیڈیم میں کھیلے جائیں گے۔ میچز کے دوران پاکستان کے سب سے سینئرامپائر اور آئی سی سی ایلیٹ پینل کے رکن علیم ڈار کے علاوہ پی سی بی ایلیٹ پینل میں شامل 6 دیگر امپائرز بھی امپائرنگ کی ذمہ داریاں ادا کریں گے۔ 6 امپائرز میں احسن رضا، آصف یعقوب، فیصل خان آفریدی، راشد ریاض، شوزب رضا اور ضمیر حیدر شامل ہیں۔پی سی بی کے ایلیٹ پینل برائے ریفری میں شامل محمد انیس ، علی نقوی، افتخار احمد اور محمد جاویدابوظہبی میں کھیلے جانے والے میچز کے دوران پلیئنگ کنٹرول ٹیم کی قیادت کریں گے۔شیڈول کے مطابق ٹورنامنٹ کا مجموعی طور پر 15واں میچ 9 جون کو لاہور قلندرز اور اسلام آباد یونائیٹڈ کے مابین کھیلا جائیگا۔ میچ میں علیم ڈار اور راشد ریاض آن فیلڈ امپائرز جبکہ شوزب رضا تھرڈ امپائر اور فیصل آفریدی فورتھ امپائرہونگے۔ محمد انیس میچ میں ریفری کے فرائض انجام دیں گے۔24 جون کو ایونٹ کے فائنل میں علیم ڈاراوراحسن رضا آن فیلڈ امپائرز ہونگے۔ آصف یعقوب تھرڈ امپائر جبکہ راشد ریاض فورتھ امپائر ہوں گے۔ محمد انیس پلیئنگ کنٹرول ٹیم کی سربراہی کریں گے۔