سیہون+ لسبیلہ (نوائے وقت رپورٹ) ٹریفک حادثات میں چھ افراد جاں بحق ہو گئے۔ تفصیلات کے مطابق انڈس ہائی وے پر مانجھند کے قریب تیز رفتار مزدا ٹرک اور کار میں تصادم ہو گیا۔ حادثے میں چار افراد موقع پر دم توڑ گئے جبکہ تین افراد زخمی ہو گئے۔ دریں اثناء کراچی سے 28 مسافروں کو کوئٹہ لے جانے والی بس میں لسبیلہ  کے قریب قومی شاہراہ پر آتشزدگی ہوئی جس نے پوری گاڑی کو اپنی لپیٹ میں لے لیا۔ ڈپٹی کمشنر کوئٹہ نے بتایا کہ ابتدائی طور پر دو مسافر جاں بحق ہوئے جبکہ سات زخمیوں کو گاڑی سے ریسکیو کیا گیا۔ ہسپتال میں ایمرجنسی نافذ کر دی گئی ہے۔ آتشزدگی کے سبب کوئٹہ کراچی شاہراہ کو بند کر دیا گیا۔