پاکستان کپ بلوچستان ناردرن سنٹرل پنجاب  کی ٹیمیں کامیاب 

لاہور(سپورٹس رپورٹر)پاکستان کرکٹ بورڈ کے زیر اہتمام پاکستان کپ میں بلوچستان ‘نادرن اور سنٹرل پنجاب کی ٹیموںکے کامیابی حاصل کرلی ۔ ملتان کرکٹ سٹیڈیم میں کھیلے گئے پاکستان کرکٹ کپ کے میچ میں بلوچستان نے 184 رنز کا ہدف 36 اوورز میں محض 2 وکٹوں کے نقصان پر حاصل کرکے خیبرپی کے کو 8 وکٹوں سے شکست دیدی۔اوپنر عمران بٹ نے 79 اور اسد شفیق نے 76 رنز کی ناقابل شکست اننگز کھیل کرٹیم کو فتح دلائی۔ دونوں کھلاڑیوں نے تیسری وکٹ کیلئے 159 رنز کی ناقابل شکست شراکت قائم کی۔ اس سے قبل خیبرپی کے کی ٹیم 40.1 اوورز میں 183 رنز پر ڈھیر ہوگئی تھی۔ وکٹ کیپر بیٹر محمد حارث 75 اور آصف آفریدی نے 57 رنز سکور کیے۔ خرم شہزاد اور عماد بٹ نے تین تین وکٹیں حاصل کیں۔ہاؤس آف ناردرن میں کھیلے گئے میچ میں ناردرن نے ڈی ایل ایس میتھڈ کے تحت سندھ کو 2 رنز سے ہرادیا۔ سندھ نے 44.4 اوورز میں 251 رنز بنائے۔ اوپنر شرجیل خان نے 84 گیندوں پر 11 چوکوں اور 7 چھکوں کی مدد سے 118 رنز سکور کیے۔ آصف علی، عامر جمال ،زمان خان اور عماد وسیم نے دو دو کھلاڑیوں کو آؤٹ کیا۔ جواب میں ناردرن نے 23.2 اوورز میں 4 وکٹوں کے نقصان پر 128 رنز بنائے تھے کہ بارش کے باعث میچ روک دیا گیا۔ محمد حریرہ نے 41 اور عمر امین نے ناٹ آؤٹ 41 رنز سکور کیے۔ناردرن کو فاتح قراردیا گیا ۔ اقبال سٹیڈیم فیصل آباد میں کھیلے گئے میچ میںسنٹرل پنجاب نے سدرن پنجاب کو 4 وکٹوں سے شکست دے دی۔ فاتح ٹیم نے 253 رنز کا ہدف 47.5 اوورز میں 6 وکٹوں کے نقصان پر حاصل کرلیا۔ حسین طلعت 84 رنز بناکر ناٹ آؤٹ رہے۔ رضوان حسین نے 59 رنز بنائے۔ فیصل اکرم نے 35 رنز کے عوض 4 وکٹیں حاصل کیں۔ سدرن پنجاب کی ٹیم پہلے بیٹنگ کرتے ہوئے 48.2اوورز میں 252 رنز پر ڈھیر ہوگئی تھی۔ سلمان علی آغا 70 اور عمران رندھاوا 48 رنز بناکر نمایاں رہے۔ وہاب ریاض اور عثمان قادر نے 3،3 کھلاڑیوں کوآؤٹ کیا۔تما م ٹیموںنے تین تین میچ کھیل لئے ہیں ۔ سندھ چار پوائنٹس کیساتھ رن ریٹ کی بدولت پہلے نمبر پرہے ۔ خیبرپی کے چار پوائنٹس کیساتھ دوسرے ‘بلوچستان چار پوائنٹس کیساتھ تیسرے ‘سنٹرل پنجاب چار پوائنٹس کیساتھ چوتھے ‘ناردرن دو پوائنٹس کیساتھ پانچویں اور سدرن پنجاب بغیر کسی پوائنٹ کے آخر ی نمبر پر ہے ۔