لاہور(سپورٹس رپورٹر)انٹرنیشنل کرکٹ کونسل ویمن ورلڈ کپ 2022 کے پہلے میچ میں قومی ٹیم کی کپتان بسمہ معروف کی جانب سے بیٹی کو گود میں لئے میدان مین داخل ہونے پر ان کی تعریفیں کی گئیں۔میچ سے قبل جب قومی ٹیم کے ارکان سٹیڈیم پہنچے تو کپتان بسمہ معروف کو اپنی کم سن بیٹی کے ہمراہ ساتھی کرکٹر کے ساتھ میدان میں داخل ہوتے دیکھا گیا۔پاکستان کرکٹ بورڈ اور آئی سی سی نے بھی بسمہ معروف کی بانہوں میں بیٹی کو تھامنے کی تصاویر شیئر کیں، جس پر لوگوں نے ان کی تعریفیں کیں۔اپنی پانچ ماہ کی بیٹی کو گود میں لیے سٹیڈیم میں روایتی حریم کیساتھ مقابلے کیلئے آنے والی بسمہ معروف کی تصاویر سامنے آنے کے بعد دنیا بھر کے لوگوں نے ان کی تعریفیں کیں اور انہیں طاقتور خاتون قرار دیا۔مرینا اقبال نے تصویر کو ری ٹوئٹ کرتے ہوئے لکھا کہ قومی ٹیم کی کپتان کی تصویر ان افراد کیلئے واضح مثال ہے جو یہ سمجھتے ہیں کہ خواتین پروفیشنل اور گھریلو ذمہ داریاں ایک ساتھ نبھا نہیں سکتیں۔ ویمنز ورلڈکپ میں میچ کے بعد بھارتی کرکٹرز قومی کپتان بسمہ معروف کی بیٹی سے گھل مل گئیں۔ بھارتی کرکٹرز ننھی فاطمہ کے اردگرد دائرہ بنا کر کھیلتی رہیں۔ بسمہ اور اْن کی بیٹی فاطمہ کیساتھ بھارتی کرکٹرز کی تصویر آئی سی سی نے بھی شیئر کی۔