لاہور(سپورٹس رپورٹر)سابق آسٹریلوی کرکٹر شین واٹسن کو قومی کرکٹ ٹیم کےساتھ ہیڈ کوچ کی ذمہ داریاں سونپے جانے کا امکان ہے۔شین واٹسن اس وقت پی ایس ایل میں کوئٹہ گلیڈی ایٹر کےساتھ بطور ہیڈ کوچ کام کررہے ہیں۔انہوں نے دوہزار سولہ میں انٹرنیشنل کرکٹ کو خیرباد کہا تھا۔ کرکٹ کو خیرباد کہنے کے بعد شین واٹس کا بطور ہیڈ کوچ کوئٹہ گلیڈی ایٹر سے پہلا معاہدہ ہوا ہے۔ذرائع کے مطابق پاکستان کرکٹ بورڈ حکام کی شین واٹسن سے قومی ٹیم کی کوچنگ کیلئے بات چیت جاری ہے۔ معاملات طے پانے کے بعد شین واٹسن کی ملاقات چیئرمین پی سی بی محسن نقوی سے بھی کرائی جائےگی۔تمام معاملات طے پانے کی صورت میں شین واٹسن کی تقرری کا باضابطہ اعلان سامنے آسکتا ہے۔ یہ پہلا موقع ہوگا کہ شین واٹس کسی بھی عالمی ٹیم کی کوچنگ کریں گے۔بطور کوچ شین واٹسن کا پہلا ٹاسک نیوزی لینڈ کےخلاف سیریز ہوگی جس کے شیڈول کا آئندہ ہفتے اعلان ہوگا۔ کوچنگ کیلئے ڈیرن سیمی بھی دوڑ میں شامل ہیں۔ ممکنہ طور پر پاکستان اور نیوزی لینڈ کے درمیان پانچ ٹی ٹونٹی میچز کی سیریز اٹھارہ اپریل سے شروع ہوسکتی ہے۔