پہلی خاور شاہ انٹر سکول بیس بال چیمپئن شپ تاج پبلک سکول نے جیت لی

لاہور(سپورٹس رپورٹر) پاکستان فیڈریشن بیس بال کے زیر اہتمام فاٹا میں منعقد ہونے والی پہلی خاور شاہ انٹرسکول بیس بال چیمپئن شپ تاج پبلک سکول ٹیم نے جیت لی۔ جمرود فاٹا میں منعقد ہونے والی اس چیمپیئن شپ میں فاٹا سے تعلق رکھنے والے چھ سکولز کی ٹیموں نے شرکت کی تھی جن میں تاج پبلک سکول، نیو ایج پبلک سکول، قائد اعظم پبلک سکول، الجنید پبلک سکول، دی مسلم پبلک سکول اور خیبر ماڈل سکول شامل کی ٹیمیں شامل تھیں۔ چیمپیئن شپ کا فائنل میچ تاج پبلک سکول اور نیو ایج پبلک سکول کی ٹیموں کے درمیان کھیلا گیا جس میں تاج پبلک سکول نے 5 کے مقابلے 7 ٹرائی سکور سے کامیابی اپنے نام کی۔ وحید آفریدی کو ٹورنامنٹ کا بہترین کھلاڑی جبکہ طارق کو بیسٹ فیلڈر، نور الامین بیسٹ پچر، اسحاق بیسٹ کیچر جبکہ عرفان بیسٹ ہٹر قرار پائے۔