سابق انسپکٹر عابد باکسر کا نام ٹارگٹ کلنگ میں ڈالنے کے خلاف درخواست منظور

لاہور(خبرنگار)لاہور ہائیکورٹ نے لاہور پولیس کے سابق انسپکٹر عابد باکسر کا نام ٹارگٹ کلر لسٹ میں ڈالنے کے خلاف درخواست منظور کرلی۔لاہور ہائیکورٹ کے جسٹس علی ضیاء باجوہ نے درخواست پر سماعت کی اور ہدایت کی کہ عابد باکسر کے خلاف اگر کوئی مقدمہ نہیں تو انہیں ہراساں نہ کیا جائے۔ سماعت کے دوران عابد باکسر کی جانب سے موقف اختیار کیا گیا کہ میرے خلاف 2009ء سے کوئی مقدمہ یا زبانی درخواست نہیں، لاہور کے مختلف تھانوں میں درج مقدمات میں بری کیا جا چکا ہوں۔ عدالت کی جانب سے استفسار کیا گیا کہ کیا عابد باکسر کے خلاف کوئی مقدمہ عدالت میں زیر التوا ہے جس پر ایس پی لیگل نے سابق انسپکٹر کے خلاف ریکارڈ عدالت میں پیش کیا اور بتایا کہ ان کے خلاف کوئی مقدمہ نہیں اور کوئی شکایت بھی درج نہیں ہے۔