لاہور‘ قصور‘ خیرپور سادات (نمائندہ خصوصی + نمائندہ نوائے وقت) چوہنگ کے علاقے شاہ پور کانجراں ملتان روڈ کے علاقے میں موٹر سائیکل پر دو بچوں سمیت چار افراد سوار ہو کر جارہے تھے کہ مین روڈ پر کھڑے کنٹینر سے موٹر سائیکل ٹکرا گئی جس کے باعث چھ سالہ شعیب اور 42 سالہ اصغر جاں بحق ہو گئے۔ حادثے میں دو سالہ مریم اور چودہ سالہ غلام عباس زخمی ہوئے۔ پولیس نے نعشیں کاغذی کارروائی کے بعد ورثاء کے حوالے کردیں۔ قصور الہ آباد، ٹھینگ موڑ سے نمائندہ نوائے وقت کے مطابق الہ آباد کا رہائشی کانسٹیل محمد نعیم جو حال ہی میں کھڈیاں تعینات ہوا تھا۔ موٹر سائیکل پرا پنے بچوں کو سکول چھوڑنے جا رہا تھاکہ دیپالپور روڈ پر نجی میرج حال کے قریب ٹریکٹر ٹرالہ کے نیچے آ گیا۔ جس کے نتیجہ میں محمد نعیم اور اس کا پانچ سالہ بیٹا حبیب موقع پر ہی جاں بحق ہوگئے۔ خیرپور سادات سے نمائندہ نوائے وقت کے مطابق جھنگی والہ سے کراچی جانے والی بس رکشے کو بچاتے ہوئے چندر بھان نالہ ملتان روڈ پر الٹ گئی۔ جس کے نتیجے میں پانچ افراد جاں بحق اور متعدد زخمی ہو گئے۔ بس میں پھنسے مسافروں کو کرین کی مدد سے نکالا گیا۔ جبکہ اوچ شریف‘ روجھان‘ کوٹ سبزل میں موٹر سائیکل حادثوں سے 3 افراد جاں بحق ہو گئے۔