لاہور( سپورٹس رپورٹر) قومی کرکٹ ٹیم کے آل راؤنڈر محمد حفیظ نے اپنی ریٹائرمنٹ کے حوالے سے اہم اشارہ دے دیا۔محمد حفیظ نے میڈیا سے گفتگو کرتے ہوئے کہا کہ ابھی ریٹائرمنٹ کا نہیں سوچا، ورلڈ کپ کے بعد اس حوالے سے سوچ بچار کروں گا۔انہوں نے کہا کہ ’میں ورلڈکپ جیتنے والی ٹیم کا حصہ بننا چاہتا ہوں۔انہوں نے پراعتماد لہجے میں کہا کہ سیمی فائنل میں جو بھی ٹیم آئے ہم اس کے لیے تیار ہیں، اگر بھارت سے بھی مقابلہ ہوا تو کوئی فکر کی بات نہیں کیونکہ ہماری ٹیم بہت فارم میں ہے اور بابر کی قیادت میں اچھی کارکردگی جاری ہے۔سیمی فائنل سے پہلے ہمارا ایک میچ سکاٹ لینڈ کیخلاف ہے، اْس میں بھی فتح حاصل کرنے کی کوشش کریں گے، سارے کھلاڑی اپنی کارکردگی پر توجہ دے رہے ہیں۔محمد حفیظ کا کہنا تھا کہ بھارت کیخلاف جیت سے ٹیم کو بہت اعتماد ملا، پہلے بھارت سے شکست ہوتی تھی تو  برے نتائج برداشت کرنا پڑتے تھے، جس کی وجہ سے کھلاڑی دباؤ کا شکار رہتے تھے۔ہم نے مشکل حالات میں ٹورنامنٹ شروع کیا، پاکستان نے اس ٹورنامنٹ میں شاندار کھیل کا مظاہرہ کیا، چیمپئن بننے کیلئے تیار ہیں۔