کراچی (اسپورٹس رپورٹر)ہمدرد یونیورسٹی اسپورٹس ڈیپارٹمنٹ کے زیراہتمام اسپورٹس ویک کا اہتمام کیا گیا۔مقابلوں میں کرکٹ، بیڈمنٹن ،والی بال ، ٹیبل ٹینس ، باسکٹ بال شامل تھے۔طلبہ و طالبات نے تمام کھیل کے شعبوں میں بڑھ چڑھ کر حصہ لیا۔ ٹورنامنٹ کی افتتاحی اور اختتامی تقریب ہمدرد یونیورسٹی کے کرکٹ اسٹیڈیم میں منعقد کی گئی جس میں وائس چانسلر ہمدرد یونیورسٹی پروفیسر ڈاکٹر سید شبیب الحسن اور قائم مقام رجسٹرار ڈاکٹر کلیم احمد غیاث اور طلبہ و طالبات کی بڑی تعداد نے شرکت کی۔ ڈیپارٹمنٹ آف ایسٹرن میڈیسن کے زیر اہتمام ایک زبردست فوڈ فیسٹیول بھی منعقد کیا گیا۔ جس میں طلبہ و طالبات نے نت نئے پکوانوں سے لطف حاصل کیا۔ اس کے علاوہ یونیورسٹی کے ایڈمنسٹریشن ڈیپارٹمنٹ کی مختلف ٹیموں نے کھیلوں میں حصہ لیا۔ کرکٹ کے مقابلے میں ہیومن ریسورس کی ٹیم فاتح قرار پائی۔ بہترین کارکردگی دکھانے والے کھلاڑی ، عزیز احمد ، شہریار ، شاہمیر ، عبید زیدی اور جواد احمد کو عمدہ کارکردگی پر انعامات بھی دیے گئے۔