جنرل(ر) رفیع عالم پولو کپ پلاٹینم ہومز نے جیت لیا

لاہور (سپورٹس رپورٹر) لاہور پولو کلب کے زیراہتمام لیفٹیننٹ جنرل (ر) شاہ رفیع عالم میموریل پولو کپ ٹورنامنٹ سپانسرڈ بائی ڈان بریڈ ٹورنامنٹ انتہائی سنسنی خیز مقابلے کے بعد ٹیم پلاٹینم ہومز نے جیت لیا، فائنل میں ڈائمنڈ پینٹس /شیخو سٹیل کی ٹیم کو 9.5-9 سے شکست کا سامنا کرنا پڑا۔ تفصیلات کے مطابق لاہور پولو کلب میں فائنل دیکھنے کیلئے تماشائیوں کی ایک بہت بڑی تعداد موجود تھی جن میں بچے، فیملیز اور خواتین بھی موجود تھیں۔ مہمان خصوصی لیفٹیننٹ جنرل (ر) شاہ رفیع عالم کی بیوہ مسز تمیز عالم تھیں۔ اس موقع پر ڈان بریڈ کے ایگزیکٹو ڈائریکٹر انوار حسین، لاہور پولو کلب کے صدر عمر صادق، سیکرٹری آغا مرتضی علی خان، ایگزیکٹو کمیٹی ممبرز شاہ قبلائی عالم، عثمان حئی، آغا نجیب رضا اور دیگر بھی موجود تھے۔فائنل میچ بہت ہی سنسنی خیز رہا پلاٹینم ہومز اور ڈائمنڈ پینٹس شیخو سٹیل کی ٹیموں کے درمیان میچ انتہائی دلچسپ رہا۔ پلاٹینم ہومز کی ٹیم صرف آخری لمحات میں آدھے گول ہینڈی کیپ کی بدولت فتح یات ہوئی۔ فائنل سکور 9.5-9 رہا۔ پلاٹینم ہومز کی طرف سے ایرانی کھلاڑی عامر رضا بہبودی نے شاندار آٹھ گولز سکور کیے اور انہیں مین آف دی فائنل کا ایوارڈ بھی دیا گیا۔ دیگر میں بلال نون نے گول سکور کیا جبکہ آدھا گول انہیں ہینڈی کیپ ایڈوانٹیج حاصل تھا۔ ڈائمنڈ پینٹس /شیخو سٹیل کی طرف سے نکلوس انٹونیو نے8 جبکہ میر حذیفہ احمد نے ایک گول سکور کیا۔ قبل ازیں سب سڈری فائنل میں ڈان بریڈ نے ایف جی /دین پولو ٹیم کو 10-6,5 سے شکست دی۔
 میڈیا سے گفتگو کرتے ہوئے کھلاڑیوں نے کہا کہ انتہائی شاندار فائنل ہوا جو کہ زندہ دلان لاہور کا خاصہ ہے۔ اس موقع پر اعتزاز احسن کا کہنا تھا کہ پولو کا اتنا دلچسپ فائنل دیکھا جسے دیکھ کر دل خوش ہوگیا۔ لاہور پولو کلب کے صدر عمر صادق نے شاہ رفیع عالم کی فیملی اور سپانسرز ڈان بریڈ کا خصوصی شکریہ ادا کیا۔