پاکستان کرکٹ ٹیم نے میچ میں نہایت عمدہ کھیل کامظاہرہ کیا: صادق سنجرانی

 اسلام آباد (خبر نگار ) چیئرمین سینیٹ محمد صادق سنجرانی نے قومی کرکٹ ٹیم کو ٹی 20 ورلڈ کپ میں بنگلہ دیش کے خلاف اہم میچ جیت کر سیمی فائنل کیلئے کوالیفائی کرنے پر مبارکباد دی ہے۔چیئرمین سینیٹ نے کہا کہ ٹی 20 ورلڈ کپ کے اہم میچ میں قومی کرکٹ ٹیم نے بنگلہ دیش  کے خلاف جیت کر شاندار فتح کو اپنے نام کیا ہے۔پاکستان کرکٹ ٹیم نے نہایت عمدہ کھیل کامظاہرہ کیا۔اُمید ہے پاکستانی ٹیم جیت کے اس تسلسل کو مستقبل میں بھی برقرار رکھے گی ۔ پوری قوم کی دعاوں اور قومی کرکٹ ٹیم اپنی شاندارکارکردگی سے ٹی 20 ورلڈ کپ کو اپنے نام کرنے میں کامیاب ہو گی۔محمد صادق سنجرانی نے کہا کہ پاکستان ایک پر امن ملک ہے اور کھیلوں کے ذریعے بھی دنیا بھر میں امن اور محبت کا پیغام پہنچاتا ہے۔پاکستانی ٹیم کی جیت کھلاڑیوں کی انتھک محنت کا نیتجہ ہے اور پوری قوم کو اپنی ٹیم کے باصلاحیت کھلاڑیوں پر فخر ہے۔  ڈپٹی چیئرمین سینیٹ سینیٹر مرزا محمد آفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹ سینیٹر ڈاکٹر شہزاد وسیم نے قومی کرکٹ ٹیم کو ٹی 20 ورلڈ کپ کے اہم میچ میں بنگلہ دیش کے خلاف شاندار فتح پر مبارکباد پیش کی ہے۔