لاہور (خصوصی رپورٹر+ اپنے نامہ نگار سے) مسلم لیگ (ن) کے مرکزی رہنما خواجہ سعد رفیق نے کہا ہے شہبازشریف کو گرفتار کرانے والوں نے پوری دنیا میں پاکستان کی بے عزتی کرائی، ٹویٹ میں انہوں نے کہا شہبازشریف کی گرفتاری سوچی سمجھی سازش کے تحت ہوئی، احتساب کے نام پر انتقام لیا جا رہا ہے۔ انتخابی جلسہ سے خطاب کرتے ہوئے انہوں نے کہا یقین ہے ضمنی انتخابات میں ن لیگ ہی جیتے گی۔ عبدالولی خان کے بعد پہلی مرتبہ اپوزیشن لیڈر کو گرفتار کیا گیا، عمران خان کوئی حسرت نہ رہ جائے ہر شوق پورا کر لو۔ سابق وزیر قانون پنجاب رانا ثناء اللہ نے کہا ہے شہبازشریف کی گرفتاری پری پول رگنگ ہے۔ نیب حکومت کی سیاسی آلہ کار بن چکی ہے۔ اپنے نامہ نگار سے کے مطابق لیگی رہنما سائرہ افضل تارڑ نے نوائے وقت سے گفتگو کرتے ہوئے کہا عمران حکومت کسی اور چکر میں ہے یہ معاملہ کرپشن کا نہیں بلکہ کوئی اور ہے۔ یہ ظلم ہے اور ظلم جب ظلم بڑھتا ہے تو مٹ جاتا ہے۔