لاہور(سپورٹس رپورٹر+نمائندہ سپورٹس) قائداعظم ٹرافی فرسٹ الیون ٹورنامنٹ کے چوتھے راؤنڈ کادوسراروز مکمل ہو گیا۔ ایبٹ آباد میں خیبرپختونخوا نے 5 وکٹوں پر 484 رنز بنا کرپہلی اننگز ڈکلیئر کر دی۔سنٹرل پنجاب کے 45 رنز پر 2 کھلاڑی آؤٹ ہوگئے۔ میزبان ٹیم کے اشفاق احمد نے ایونٹ میں اپنی تیسری سنچری سکور کی۔ وہ 173 رنز بناکر آؤٹ ہوئے۔ کپتان محمد رضوان 128 رنز بناکر آؤٹ ہوئے۔ سنٹرل پنجاب کے سلمان بٹ کھاتہ کھولے بغیر‘ محمد سعد 19 رنز بناکر چلتے بنے۔ اظہر علی 22 اور عثمان صلاح الدین 1 رن بنا کر موجود ہیں۔راولپنڈی میں ناردرن کی ٹیم پہلی اننگز میں 450 رنز بنا کر آؤٹ ہوگئی۔ فیضان ریاض 141 رنز بنا کر نمایاں رہے۔ عماد بٹ نے 3 کھلاڑیوں کو آؤٹ کیا۔ جواب میں بلوچستان نے 2 وکٹوں پر 119 رنز بنالیے۔ عظیم گھمن 5 رنز بنا کر پویلین لوٹ گئے‘ عمران بٹ اور ابوبکرکے درمیان 110 رنز کی شراکت قائم ہوئی۔ دونوں نے نصف سنچریاںسکورکی۔ عمران بٹ 58 اور عمران فرحت 1 ر ن بنا کر موجود ہیں۔ کراچی میںعامر یامین اور محمد عرفان جونیئر کی سنچریوں کی بدولت سدرن پنجاب کی ٹیم نے پہلی اننگز میں 546 رنز کا پہاڑ کھڑا کردیا۔ جواب میں سندھ نے 1 وکٹ پر 90 رنز بنالیے۔پنجاب نے 303 رنز 5 کھلاڑی آؤٹ سے اپنی پہلی اننگز کا دوبارہ آغاز کیا تو عامر یامین 142 رنز بناکر آؤٹ ہوگئے۔ سپنر محمد عرفان 101 رنز بنا کر رن آؤٹ ہوئے۔ سہیل خان، تابش خان، ولید احمداورفواد عالم نے 2،2 کھلاڑیوں کو آؤٹ کیا۔ جواب میں سندھ کے خرم منظور 36 رنز بنا کر آؤٹ ہوگئے۔ دن کے اختتام پر عابد علی 42 اور عمیربن یوسف 5رنز بنا کر موجود ہیں۔