کامیڈی کنگ عمر شریف مزار عبداللہ شاہ غازی کے احاطہ میں سپرد خاک

کراچی (نیوز رپورٹر) کامیڈی کنگ اور لیجنڈ اداکار عمر شریف کو حضرت عبداللہ شاہ غازی کے مزار کے احاطے میں سپرد خاک کردیا گیا۔ اس موقع پر  مزار کے اطراف سکیورٹی الرٹ جب کہ مزار جانے والا حصہ بھی بند کردیا گیا۔ تدفین کے عمل میں صرف اہلِ خانہ، قریبی عزیز اور چند اہم شخصیات نے حصہ لیا۔ قبل ازیں عمر شریف کا جسد خاکی گلشن اقبال میں واقع ان کی رہائش گاہ سے کلفٹن میں ان کے نام سے منسوب پارک میں پہنچایا گیا جہاں  معروف عالم دین و سیلانی ویلفیئر کے سربراہ  علامہ بشیر فاروق قادری نے نماز جنازہ  پڑھائی۔ نماز جنازہ میں مرحوم کے اہل خانہ اور عزیز و اقارب،  گورنر سندھ عمران اسماعیل، صوبائی وزیر سعید غنی، ایڈمنسٹریٹر کراچی مرتضی وہاب، مولانا تنویر الحق تھانوی، فیصل ایدھی، چیئرمین پی ایس پی مصطفی کمال، پی ٹی آئی رہنما خرم شیر زمان، پی ایس پی رہنما انیس قائم خانی، ایم کیو ایم بحالی کمیٹی کے سربراہ ڈاکٹر فاروق ستار، آرٹس کونسل کے صدر احمد شاہ  کے علاوہ  مداحوں، سیاسی و سماجی رہنماؤں اور شوبز انڈسٹری سے تعلق رکھنے والی شخصیات اور   عوام کی بڑی تعداد نے شرکت کی۔ عمر شریف کی تدفین کے موقع پر کئی اہم شخصیات موجود رہیں اور اس موقع پر سکیورٹی کے انتظامات بھی سخت کیے گئے تھے۔  پولیس اور رینجرز کی بھاری نفری جنازہ گاہ کے اطراف موجود تھی۔ ادھر اداکارہ شیبا بٹ، گلوکارہ شازیہ کوثر اور دیگر شوبز سے تعلق رکھنے والی شخصیات کراچی میں واقع عمر شریف کی رہائش گاہ پہنچیں، جہاں انہوں نے مرحوم اداکار کے اہل خانہ سے اظہار تعزیت کیا۔