کراچی (نوائے وقت رپورٹ) بینظیر بھٹو اور آصف علی زرداری کی بڑی صاحبزادی بختاور بھٹو زرداری کے ہاں دوسرے بیٹے کی پیدائش ہوئی ہے۔ بختاور بھٹو نے اپنے سوشل میڈیا اکاؤنٹ پر اپنے دوسرے بیٹے کی ولادت  کی خبر دیتے ہوئے خدا کا شکر ادا کیا ہے۔ بختاور بھٹو نے اپنے شوہر محمود چودھری کو بھی پوسٹ میں  ٹیگ کرتے ہوئے کیپشن میں بتایا ہے کہ گزشتہ روز 5 اکتوبر کو ان کے دوسرے بیٹے کی پیدائش ہوئی۔ یاد رہے کہ گزشتہ برس بختاور بھٹو زرداری اور محمود چودھری کے بڑے بیٹے میر حاکم کی ولادت بھی 10اکتوبر کو ہوئی تھی۔ ادھر وفاقی وزیر برائے خارجہ امور بلاول بھٹو زرداری نے دوسری بار ماموں بننے کا پر خوشی کا اظہار کیا ہے۔ چیئرمین پی پی نے اپنے مائیکروبلاگنگ ویب سائٹ ٹوئٹر پر بہن، بختاور بھٹو کا ٹویٹ ری ٹویٹ کیا ہے۔ اپنے ٹویٹ کے کیپشن میں خوشی منانے کا ایموجی بناتے ہوئے لکھا ہے کہ دو بچوں کا ماموں۔ دوسری جانب دوسری بارخالہ بننے والی آصفہ بھٹو نے بھی اپنے انسٹاگرام پر بڑی بہن بختاور بھٹو کی انسٹا سٹوری کو ری شیئر کیا ہے۔