کراچی (نوائے وقت رپورٹ) پاکستان پیپلزپارٹی کے صدر آصف علی زرداری کی صاحبزادی اور چیئرمین بلاول بھٹو زرداری کی بہن بختاور بھٹو زرداری کا دوسرا بیٹا ایک سال کا ہو گیا۔ محترمہ بینظیر بھٹو شہید کی بڑی بیٹی بختاور بھٹو کے گزشتہ سال 5 اکتوبر کو پیدا ہونے والے دوسرے صاحبزادے میر سجاول محمود چودھری کی گزشتہ روز پہلی سالگرہ تھی۔ فوٹو اینڈ ویڈیو شیئرنگ پلیٹ فارم انسٹاگرام پر سٹوری شیئر کرتے ہوئے بختاور نے اپنے چھوٹے بیٹے کو منفرد انداز میں سالگرہ کی مبارکباد دی اور ساتھ ہی اس کے ہمراہ ایک مختصر ویڈیو کلپ بھی شیئر کیا ہے۔ انہوں نے اپنی انسٹا سٹوری میں اپنے دونوں بیٹوں کی خوبصورت تصویر شیئرکی ہیں اور لکھا ہے کہ اگلے 5 دن کیلئے میں دو ایک سال کے لڑکوں کی ماما ہوں۔ پہلی سالگرہ مبارک ہو میرے سجاول۔ ان کی شیئر کی گئی تصویر میں میر حاکم محمود چودھری اور میر سجاول محمود چودھری کی شکلیں نظر نہیں آرہیں۔ انہوں نے اپنے چھوٹے بیٹے میر سجاول محمود چودھری کے ہمراہ ایک مختصر ویڈیو کلپ بھی شیئر کیا جس کے کیپشن میں انہوں نے لکھا کہ ”پہلی سالگرہ مبارک ہو میرے سجاول‘ اللہ آپ کی رہنمائی اور حفاظت کرے۔“ دوسری جانب ننھے میر سجاول محمود چودھری کے ماموں بلاول بھٹو زرداری اور خالہ آصفہ بھٹو زرداری نے بھی اس خاص دن کی مناسبت سے اپنے ننھے بھانجے کو مبارکباد دیتے ہوئے انسٹا سٹوری شیئر کی ہے۔