لاہور (سپورٹس رپورٹر)پاکستان کی بلائنڈ کرکٹ ٹیم نے پاکستان کرکٹ بورڈ کی مینجمنٹ کمیٹی کے چیئرمین ذکاءاشرف سے قذافی سٹیڈیم لاہور میں ملاقات کی۔ ذکاءاشرف نے ٹیم کو انٹرنیشنل بلائنڈ سپورٹس فیڈریشن ورلڈ گیمز میں طلائی تمغہ جیتنے پر مبارکباد دی اور ٹیم کی شاندار کارکردگی پر ہر کھلاڑی اور آفیشل کو تین تین لاکھ روپے کا چیک پیش کیا۔ذکا ءاشرف کا کہنا تھا کہ وہ بلائنڈ ٹیم کو اس شاندار کارکردگی پر مبارک باد پیش کرتے ہیں۔بلائنڈ کرکٹ ٹیم کی یہ شاندار کامیابیاں یہ ثابت کرتی ہیں کہ ہمارے کھلاڑی ہر چیلنج کا مقابلہ کرکے بہترین کارکردگی دکھانے کی بھرپور صلاحیت رکھتے ہیں۔ پاکستان کرکٹ بورڈ بلائنڈ کرکٹ کی سپورٹ جاری رکھے گا۔