کراچی (نوائے وقت رپورٹ/کامرس رپورٹر ) کراچی ائیرپورٹ کے قریب دھماکہ میں ایک شخص جاں بحق ہوگیا۔ایس ایس پی ملیر کے مطابق کراچی میں ائیرپورٹ سگنل کے قریب زودار دھماکہ  ہوا جس کے بعد گاڑیوں میں آگ لگ گئی۔وزیر داخلہ سندھ ضیا لنجار کا کہنا ہے اطلاعات ہیں دھماکا آئی ای ڈی ہے، دھماکے کی تحقیقات شروع کردی ہیں۔انہوں نے کہا دھماکے کا نشانہ بننے والی گاڑی میں غیرملکی شہری سوار تھے، دھماکے کے نتیجے میں ایک غیر ملکی شہری زخمی ہوا۔ پولیس نے بتایا دھماکے میں ایک شخص جاں بحق اور 10زخمی ہوگئے جنہیں ہسپتال منتقل کردیا گیا۔ ایچ او ڈی ایمرجنسی ڈاکٹر نوشین نے بتایا دھماکے کے 10زخمی جناح ہسپتال لائے گئے ہیں۔ پولیس ‘ رینجرز اہلکار اور فائربریگیڈ کا عملہ  فوری موقع پر پہنچے ۔ دھماکے سے 2 گاڑیوں اور 2 موٹر سائیکلوں میں آگ لگی ۔ ائیرپورٹ ذرائع کے مطابق ائیرپورٹ پر تمام تنصیبات محفوظ ہیں۔ دھماکے کی آواز کریم آباد، ڈیفنس اور جمشید روڈ کے اطراف میں بھی سنی گئی۔