آباد سستی لاگت کے مکانات تیارکرکے حکومت کاہاتھ بٹائے گی

کراچی(اسٹاف رپورٹر)ایسوسی ایشن آف بلڈرز اینڈ ڈیولپرز(آباد)کے سرپرست اعلیٰ محسن شیخانی اور چیئرمین آباد عارف یوسف جیوا نے ڈاکٹر عارف علوی کو اسلامی جمہوریہ پاکستان کا 13واں صدر منتخب ہونے پر مبارکباد پیش کی ہے۔محسن شیخانی نے کہا کہ ملک میںپی ٹی آئی کی حکومت منتخب ہونے سے اب ملک میں سستی لاگت کے مکانات کے منصوبے کو عملی شکل بھی دی جائے گی جسکا وعدہ وزیراعظم عمران خان نے قوم سے اپنے خطاب اور آباد ہائوس کے دورے کے موقع پر آباد ممبران سے گفتگو میں کیا تھا،ہم عمران خان کے اس عزم اور کوششوں میں مکمل ساتھ دیں گے اور آباد رضاکارانہ طور پر اپنی خدمات حکومت کو پیش کرتی ہے۔چیئرمین آباد عارف یوسف جیوا نے کہا کہ آباد کی پوری ٹیم نئی حکومت کے معاشی ایجنڈے کی تکمیل میں انکا بھرپور ساتھ دے گی،عمران خان کے وزیر اعظم بننے سے چھت سے محروم افراد کو یہ امید بندھ چلی ہے کہ انہیں سستے مکانات میسر آسکیں گے۔