دہشتگردی کیخلاف جنگ‘ علاقائی امن کیلئے پاکستان کے کردار کو سراہتے ہیں: امریکی نائب وزیر دفاع

واشنگٹن (انٹرنیشنل ڈیسک) امریکی نائب وزیر دفاع رینڈل شریور نے کہا ہے کہ پاکستان نے دہشت گردی کے خلاف جنگ میں قابل قدر کردار ادا کیا۔ واشنگٹن ڈی سی میں پاکستانی سفارتخانے میں یوم دفاع و شہداء کی تقریب ہوئی۔ جس سے خطاب کرتے رینڈل شریور نے کہا کہ پاکستان اور امریکی افواج کے مابین بہترین تعلقات کار ہیں۔ علاقے میں امن کیلئے پاکستان کی قیادت کے کردار کو سراہتے ہیں۔ پاکستانی سفیر اسد مجید خان نے کہا کہ ملک کے دفاع کیلئے جانیں دینے والوں کو خراج تحسین پیش کرتے ہیں۔ پاکستان نے بیرونی جارحیت کے علاوہ دہشت گردی کے عفریت کو شکست دی۔ ہم علاقائی اور عالمی سطح پر امن و سلامتی، آزادی اور انسانیت کے احترام کا عزم رکھتے ہیں۔ اسد مجید خان نے کہا کہ تیرہ ملین کشمیری گھروں میں محصور ہیں اور باقی دنیا سے کٹ کر رہ گئے ہیں۔ افواج پاکستان ملک کی سلامتی کو درپیش کسی بھی خطرے سے نمٹنے کیلئے تیار ہیں۔ بھارت کی کنٹرول لائن پر بلا اشتعال فائرنگ کے جواب میں ذمہ داری کا مظاہرہ کر رہے ہیں۔