ٹریفک حادثات،گوجرانوالہ باپ ،بیٹی:شکر گڑھ میں2افراد جاں بحق

گوجرانوالہ+ گکھڑ+ وزیر آباد+ شکر گڑھ (نمائندہ خصوصی + نامہ نگاران) ٹریفک حادثات میں باپ بیٹی سمیت 4 افراد جاں بحق جبکہ خاتون سمیت 3 افراد زخمی ہو گئے۔ گوجرانوالہ سے نمائندہ خصوصی کے مطابق تیز رفتار ٹرک کی ٹکر سے موٹر سائیکل سوار تین سالہ بچی اور نوجوان جاں بحق جبکہ بیوی زخمی ہو گئی۔ پولیس نے ٹرک ڈرائیور کو گرفتار کر لیا۔ ورثا کی طرف سے کارروائی نہ کرنے کی درخواست کر دی۔ موٹر سائیکل سوار علی حمزہ، شمائلہ اور اس کی بیٹی تین سالہ عنیقہ وزیر آباد سے گکھڑ کی طرف جا رہے تھے کہ گکھڑ کے قریب جی ٹی روڈ پر تیز رفتار ٹرک کی ٹکر سے علی حمزہ اور تین سالہ عنیقہ موقع پر ہی جاں بحق ہو گئے جبکہ شمائلہ زخمی ہو گئی۔ شہریوں نے ٹرک ڈرائیور کو پکڑ کر پولیس کے حوالے کر دیا۔ شکرگڑھ سے نامہ نگار کے مطابق ظفروال روڈ پر تیز رفتار کار درخت سے ٹکرانے سے دو افراد جاں بحق اور دو شدید زخمی ہوگئے۔ گائوں دارا پور کے 35 سالہ انتظار علی‘  37 سالہ بشارت علی‘  34 سالہ سکندر علی اور 25 سالہ اسد علی کار پر شکرگڑھ جا رہے تھے۔ ظفروال شکرگڑھ روڈ پر گائوں بمبو کے قریب کار تیز رفتاری کے باعث درخت سے ٹکرا گئی۔ حادثہ میں شدید زخمی ہونے والے دو افراد سکندر علی اور اسد علی موقع پر ہی جاں بحق ہوگئے۔