لاہور(اسپورٹس ڈیسک )یو ایس اوپن ٹینس میں سپینش سٹار رافیل نڈال امریکی کھلاڑی فرانس ٹیافو کے ہاتھوں اپ سیٹ شکست سے دوچار ہوگئے، شکست کے بعدکسی بھی بڑی چیمپئن شپ کے کوارٹر فائنل میں پہلی بار پہنچنے والے ٹیافو نے نڈال کو ایونٹ سے بھی باہر کردیا۔ چار مرتبہ یو ایس اوپن کا ٹائٹل جیتنے والے 36 سالہ ہسپانوی ٹینس سٹار رافیل نڈال کو مردوں کے سنگلز مقابلوں کے چوتھے رائونڈ میچ میں امریکہ کے ٹینس سٹار فرانسس ٹیافو نے اپ سیٹ شکست سے دوچار کر دیا۔سیکنڈ سیڈ رافیل نڈال کو 4-6، 6-4، 4-6 اور 3-6 سے اپ سیٹ شکست دے کر نہ صرف میگا ایونٹ سے باہر کر دیا بلکہ کوارٹر فائنل کیلئے بھی کوالیفائی کرلیا۔شکست کے بعد رافیل نڈال کاکیریئر کا 23 واں گرینڈ سلام ٹائٹل جیتنے کا خواب چکناچور ہوگیا۔ فرانسس ٹیافو کا فلشنگ میڈوز میں سیمی فائنل میں جگہ بنانے کیلئے مقابلہ روس کے آندرے روبلوف سے ہوگا۔ فرانسس ٹیافونے کامیابی کے بعدکہاکہ وہ اس فتح پر بہت خوش ہیں ۔ اس میں کوئی شک نہیں رافیل نڈال ٹینس کے عظیم کھلاڑی ہیں اور ان کو شکست دینا آسان نہیں تھا تاہم میں نے درست شارٹس کا استعمال ٹھیک وقت پر کرتے ہوئے کامیابی حاصل کی۔ وہ کوارٹر فائنل میں بھی فتح حاصل کرتے ہوئے ٹاپ فور کیلئے کوالیفائی کریں گے۔