لاہور+اسلام آباد(سپورٹس رپورٹر+خبرنگار خصوصی)پاکستان کے حیدر علی نے پیرالمپکس میں برانز میڈل جیت لیا۔ پیرالمپک گیمز میں پاکستان کے حیدر علی ڈسکس تھرو میں برونز میڈل جیتنے میں کامیاب رہے ، اْنہو ں نے 52.54 کی تھرو کے ساتھ تمغہ اپنے نام کیا۔پیرس میں جاری پیرالمپک گیمز میں ڈسکس تھرو کے ایف 37 کیٹیگری کا فائنل کھیلا گیا ، پاکستان کے حیدر علی نے 52.28 کی تھرو کی، اْن کی دوسری تھرو فاؤل قرار دی گئی۔تاہم وہ ابتدائی 2 راؤنڈ تک پہلی پوزیشن پر رہے ، اْس کے بعد اْن کی مسلسل 3 تھرو فاؤل قرار دی گئیں، اس دوران اْزبکستان اور کینیڈا کے اتھلیٹ اْن سے بہتر تھرو کرنے کی وجہ سے پہلی اور دوسری پوزیشن پر آگئے۔حیدر علی نے اپنی آخری تھرو میں کچھ بہتر کارکردگی دکھائی جس میں وہ 52.54 کی تھرو کرنے میں کامیاب رہے لیکن وہ اْزبک اور کینیڈین اتھلیٹس سے بہتر تھرو نہ کرسکے اور تیسرے نمبر پر رہے۔یہ ایونٹ ازبکستان کے ٹولیبائے نے 57.28 کی تھرو کیساتھ جیتا ، کینیڈا کے جیسی زیسیو نے چاندی کا تمغہ حاصل کیا جبکہ حیدر علی نے برونز میڈل اپنے نام کیا۔یہ حیدر علی کا پیرالمپکس میں چوتھا میڈل ہے۔انہوں نے اس سے قبل ٹوکیو پیرالمپکس میں گولڈ میڈل حاصل کیا تھا۔حیدر علی پاکستان کی طرف سے پیرالمپکس میں حصہ لینے والے واحد اتھلیٹ ہیں۔وزیر اعظم شہباز شریف نے پاکستانی اتھلیٹ حیدر علی کو پیرس پیرا اولمپکس 2024 ء میں ڈسکس تھرو ایونٹ میں کانسی کا تمغہ جیتنے پر مبارکباد دی۔انہوںنے کہا کہ ہم پاکستانی جشن منا رہے ہیں۔آپ کی ہمت اور عزم پوری قوم کیلئے تحریک کا باعث ہے،" وزیر اعظم نے اپنی X ٹائم لائن پر لکھا۔انہوں نے اپنی مستقبل کی کوششوں کیلئے نیک خواہشات کا اظہار بھی کیا۔