لاہور+ گوجرانوالہ (نامہ نگار + نمائندہ خصوصی) صوبائی دارالحکومت کے مختلف علاقوں میں وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا۔ 10 گھروں سے ڈاکوئوں نے 68 لاکھ روپے کا مال لوٹ لیا جبکہ چور 3 گاڑیاں اور 5 موٹر سائیکل لے گئے۔ جبکہ گوجرانوالہ میں مہمان بن کر آنے والے ڈاکوئوں نے دو حقیقی دولہا بھائیوں کو دلہنوں سمیت لوٹ لیا۔ تفصیلات کے مطابق ڈاکوئوں نے فیکٹری ایریا میں اشفاق کے گھر سے10 لاکھ، لوئر مال میں ڈاکوئوں نے اکرام کے گھر سے9 لاکھ، غازی آباد میں ادریس کے گھر سے8لاکھ، قلعہ گجر سنگھ میں فیصل کے گھر سے8لاکھ، بادامی باغ میں صغیر احمد کے گھر سے7 لاکھ، سمن آباد میں عمران کے گھر سے7لاکھ، جوہر ٹائون میں اختر کے گھر سے5لاکھ، برکی میں نصراللہ خان کے گھر سے5لاکھ، پرانی انارکلی میں شوکت کے گھر سے3لاکھ، ملت پارک میں عمر خان کے گھر سے3لاکھ کی نقدی، طلائی زیورات، موبائل فون اور دیگر سامان لوٹ لیا۔ ڈاکوئوں نے ریس کورس میں ڈاکوئوں نے فرحان کی فیملی سے 5 لاکھ،ماڈل ٹائون میں احمد یار کی فیملی سے 3 لاکھ،شاہدرہ میں سجاد کی فیملی سے 3لاکھ،ٹائون شپ میں ظفر کی فیملی سے 2 لاکھ،نواب ٹائون میں ذوالفقار کی فیملی سے 2 لاکھ،سبزہ زار میں عثمان کی فیملی سے 2 لاکھ، ساندہ میں سلیم کی فیملی سے ایک لاکھ کی نقدی، طلائی زیورات اور موبائل فون لوٹ لئے۔ڈاکوئوں نے اقبال ٹائون میں کاشف سے50ہزار اور موبائل، راوی روڈ میں راشد سے40ہزار اور موبائل،مصطفی ٹائون میں انور سے40ہزار اور موبائل،گڑھی شاہو میں افتخار سے35ہزار اور موبائل،مصری شاہ میں شہباز سے20ہزار اور موبائل فون چھین لیا۔چوروں نے ستوکتلہ میں مشتاق کے گھر سے 10 لاکھ مالیت،شمالی چھائونی میں چوروں نے رفیق کے گھر سے5لاکھ مالیت،شیرا کوٹ میں ندیم موبائل شاپ سے2لاکھ مالیت کا سامان چوری کرلیا۔ چوروں نے گارڈن ٹائون میں اصغر، ستوکتلہ میں الیاس،نشتر کالونی میں وسیم کی کاریں جبکہ فیصل ٹائون میں احمد،سمن آباد میں عدنان، مزنگ میں جنید،مصطفی آباد میں نعیم اور گوالمنڈی میں دائود کی موٹر سائیکلیں چوری کرلی گئیں۔ادھر گوجرانوالہ میں دعوت ولیمہ میں مہمان بن کر آنے والے 3 ڈاکوئوں نے 2 حقیقی دولہے بھائیوں سمیت دلہنوں کو لوٹ لیا۔ باراتیوں نے 2 ڈاکوئوں کو پکڑ کر درگت بنا ڈالی۔ ملہی چوک میں افضل اور ندیم 2 بھائیوں کی دعوت ولیمہ کی تقریب جاری تھی جہاں مہمان بن کر 3 ڈاکو گھس آئے اور موقع پاکر اڑھائی لاکھ روپے نقدی اور 40 تولے زیورات دولہوں اور دلہنوں سے لوٹ لئے او رفرار ہوگئے۔ جبکہ باراتیوں نے تعاقب کرکے 2 ڈاکوئوں کو پکڑ کر ان کی ٹھکائی کردی۔ اروپ پولیس کے مطابق پکڑے جانے والے ڈاکوئوں کا نام نام شاہد اور اقبال ہے۔ اے پی پی کے مطابق ملتان میں ڈاکو سگریٹ کمپنی کے عملے سے 48 لاکھ روپے لوٹ کر فرار ہوگئے۔ مزاحمت پر سکیورٹی گارڈ کو زخمی کردیا۔