لاہور(سپورٹس رپورٹر)قومی کرکٹ ٹیم کے کپتان بابراعظم کا کہنا ہے کہ اْنہیں ہوم گرائونڈ پر کرکٹ کی بہترین ٹیم کیخلاف کھیل کر خوشی ہوئی۔بابراعظم نے فوٹو اینڈ ویڈیو شیئرنگ ایپ انسٹا گرام پر آسٹریلوی ٹیم کے دورہ پاکستان سے کچھ یاد گار لمحات کی تصاویر شیئر کی ہیں۔اْنہوں نے یہ تصاویر شیئر کرتے ہوئے لکھا کہ’اپنے ملک میں کرکٹ کی بہترین ٹیموں میں سے ایک کے خلاف کھیلنا خوشی کی بات تھی۔اْنہوں نے امیدکا اظہار کرتے ہوئے لکھا کہ’وہ پر امید اور مستقبل قریب میں اس طرح کے بہت سے دوروں کے منتظر ہیں۔ آخر میں بابر اعظم نے اپنی پوری ٹیم کا مثبت رہنے اور شائقینِ کرکٹ کا ٹیم کی پرجوش انداز میں حوصلہ افزائی کرنے کیلئے شکریہ ادا کیا۔