خضدار میں بم دھماکہ‘ 2 افراد جاں بحق‘ 5 زخمی

خضدار + کوئٹہ (نوائے وقت رپورٹ) بلوچستان کے شہر خضدار میں بم دھماکے میں دو افراد جاں بحق اور خاتون سمیت 5 افراد زخمی ہو گئے۔ ڈپٹی کمشنر خضدار کے مطابق بم ایک موٹر سائیکل میں نصب تھا۔ دھماکہ تجارتی مرکز عمر فاروق چوک کے قریب ہوا۔ زخمیوں کو طبی امداد کیلئے ہسپتال منتقل کر دیا گیا ہے۔ وزیراعلیٰ بلوچستان سرفراز بگٹی نے خضدار بم دھماکے کی مذمت کی ہے۔ انہوں نے کہا کہ معصوم افراد کو نشانہ بنانا غیر انسانی اور بزدلانہ فعل ہے۔ بے گناہ لوگوں کو نشانہ بنانے والوں کو معاف نہیں کیا جائے گا۔ عوام اور سکیورٹی فورسز دہشت گردوں کا قلع قمع کریں گے۔ کوئٹہ میں سبزی روڈ پر مسلح افراد کی فائرنگ سے ایک شخص جاں بحق ہو گیا۔ پولیس کے مطابق فائرنگ سے دو افراد زخمی بھی ہوئے جن کو طبی امداد کیلئے ہسپتال منتقل کر دیا گیا ہے۔