لاہور(سپورٹس رپورٹر)نیوزی لینڈ کے خلاف 5 میچز کی ٹی ٹونٹی سیریز کیلئے پاکستان کرکٹ ٹیم کے ممکنہ کھلاڑیوں کے نام سامنے آگئے۔ذرائع کے مطابق پاکستان ٹی ٹونٹی سکواڈ کا اعلان 8 کی بجائے9 اپریل کو ہونے کا امکان ہے ، قومی سکواڈ کے 18 ناموں کا اعلان قومی سلیکٹرز پریس کانفرنس میں کرینگے۔ عثمان خان، عماد وسیم ،محمد عامر ‘ عرفان نیازی‘ بابراعظم،صائم ایوب ،محمد رضوان،شاداب خان،افتخاراحمد‘اعظم خان، شاہین آفریدی، نسیم شاہ اور زمان خان سکواڈ کا حصہ ہوں گے۔ ابرار احمد اور اسامہ میر میں سے ایک کھلاڑی سکواڈ کا حصہ بنے گا۔ذرائع کا کہنا ہے کہ آغا سلمان، صاحبزادہ فرحان، فخرزمان،وسیم جونیئر،عباس آفریدی کی بھی سکواڈ میں شمولیت کا امکان ہے۔حارث رؤف انجری کے باعث سکواڈ کا حصہ نہیں ہوں گے۔ ٹیم مینجمنٹ کے غیر ملکی ہیڈ کوچز کا اعلان 15 اپریل جبکہ اسسٹنٹ کوچ کا اعلان 20 اپریل کے بعد کیا جائیگا۔نیوزی لینڈ سیریز میں لوکل کوچز خدمات انجام دیں گے۔قومی ٹی ٹونٹی سکواڈ کے کھلاڑی 14 اپریل کو اسلام آباد میں رپورٹ کرینگے۔ پاکستان اور نیوزی لینڈ کے درمیان پہلا ٹی ٹونٹی میچ 18اپریل کو پنڈی سٹیڈیم میں کھیلا جائیگا۔