سرگودھا میاں چنوں ، کسووال میں حادثات ،چچاکمس بھتیجے سمیت 8افرادضاں بحق

سرگودھا+ میاں چنوں+ کسووال (نامہ نگاران + نمائندہ گان) ٹریفک حادثات میں چچا بھتیجے سمیت 8 افراد جاں بحق ہو گئے۔ تفصیلات کے مطابق سرگودھا آجنالہ روڈ پر چک 10 کے قریب قدرت آباد کے قریب تیز رفتاری کے باعث تین موٹر سائیکلوں کے تصادم کے باعث گرنے والے چھ افراد کو تیز رفتار ڈمپر کے کچل دینے کے نتیجہ میں چک 8 شمالی کی 12 سالہ آمنہ بی بی، چک 8 شمالی کا 13 سالہ حسن علی، چک 24شمالی کا 12 سالہ مطیع اللہ اور چک 5 جنوبی کا محمد عامر جاں بحق اور چک 22 کا 25 سالہ احتشام اور چک 24 بھلوال کا 25 سالہ زیب علی شدید زخمی ہو گئے۔ دریاخان کی مائن سے تیس سالہ نوجوان کی نعش ملی اور دریا خان سے بھکر روڈ پر تیز رفتار دو موٹر سائیکلوں کے آمنے سامنے تصادم میں 18 سالہ نوجوان محمد احمد اور تین افراد شدید زخمی ہو گے۔ علاوہ ازیں میاں چنوں میں مہر آباد کے قریب کار اور موٹرسائیکل میں ٹکر ہوئی، حادثے میں دو افراد جاں بحق ہو گئے۔ جاں بحق ہونے والے محمد آصف اور شہزاد کا تعلق نواحی گاؤں 125 پندرہ ایل سے ہے۔ دریں اثنا اوکانوالہ روڈ پر 43 بارہ ایل کے قریب موٹرسائیکل اور دودھ والی گاڑی میں تصادم کے نتیجہ میں 49 بارہ ایل کے رہائشی موٹرسائیکل سوار چچا انوار الحق اور اس کا4 سالہ بھتیجا جاں بحق ہوگئے۔ چچا اور بھتیجا عید کی شاپنگ کرکے واپس گھر جارہے تھے ۔ دوسرا حادثہ نیشنل ہائی وے پر سٹاپ 110بارہ ایل کے قریب پیش آیا جس میں کنٹینر کی اچانک بریک لگنے پر پیچھے سے آنے والی دودھ والی گاڑی کی ٹکر حادثہ میں ظہور احمد سکنہ تلمبہ شدید زخمی ہوگیا جسے ریسکیو 1122 نے موقع پر پہنچ کر طبی امداد فراہم کردی۔