مراد سعید کیچڑ اچھال کر اپنا سیاسی کیرئیر دائو پر نہ لگائیں: ریحام

اسلام آباد (ایجنسیاں + نوائے وقت رپورٹ) عمران خان کی سابق اہلیہ ریحام خان نے کہا ہے کہ مراد سعید مجھ پر کیچڑ اچھال کر سیاسی کیرئیر داؤ پر نہ لگائیں، سچائی سے آپ کو صدمہ پہنچے گا۔ مراد سعید کی جانب سے الزام تراشی پر ردعمل میں ریحام خان نے ٹوئٹر پر اپنے پیغام میں کہا کہ مراد سعید کے تمام سوالات کے جواب شواہد کے ساتھ دے سکتی ہوں۔ مراد سعید کو سوات کے عوام نے ووٹ دیکر قومی اسمبلی کا رکن منتخب کیا لیکن وہ ہفتے میں 5 دن مختلف ٹی وی چینلوں میں نظر آتے ہیں جبکہ انکے حلقے کے عوام مشکلات کا سامنا کرتے ہیں اور میں ان سیاسی کارکنوں سے ملتی ہوں۔ مرادسعید کیلئے بہتر ہے وہ اپنی حد میں رہیں کیونکہ سب کو انکی اصلیت کا پتہ ہے۔ دوسری جانب ریحام خان نے مسلم لیگ (ن) کے رہنما ملک نور اعوان سے ملاقات بھی کی ہے۔ ملک نور اعوان نے کہا کہ ریحام خان سے کافی روز قبل ملاقات ہوئی تھی۔ یہ پراپیگنڈا بے بنیاد ہے کہ ملاقات سیاسی نوعیت کی تھی۔ ریحام خان بچوں کیلئے این جی او چلاتی ہیں، ان بچوں کیلئے سمندر پار پاکستانیوں کی امداد سے متعلق بات ہوئی تھی۔ ریحام خان نے کہا کہ ملک نور اعوان اوورسیز پاکستانی ہیں۔ ملک نور اعوان کی دلچسپ سٹوری پر اپنی ویب سائٹ کیلئے فلم بنانا چاہتے ہیں، میں جسے بھی ملوں مجھے کوئی ڈکٹیٹ یا کنٹرول نہیں کرسکتا۔ ہم خواتین کو کیا پیغام دے رہے ہیں۔ خواتین کو پیغام دیا جا رہا ہے کہ ہراساں کرنے کے خلاف بات کی تو سازش قرار دیا جائیگا۔ دیگر خواتین کو بھی اس گندگی میں گھیسٹا جائیگا۔