کراچی:میٹروویل سائٹ سے کالعدم لشکر جھنگوی کا اہم دہشت گرد گرفتار

کراچی(صباح نیوز)سی ٹی ڈی نے سائٹ ایریا کے علاقے میٹروویل کراچی میں کارروائی کرتے ہوئے کالعدم لشکر جھنگوی کے اہم کارندے خان بادشاہ عرف خان باچا کو گرفتارکرلیا ،انچارج سی ٹی ڈی کے مطابق ملزم سے اسلحہ اور بینک سے لوٹی گئی رقم بھی برآمدکی گئی ہے۔سی ٹی ڈی انچارج کراچی راجہ عمر خطاب کا کہنا ہے کہ کارروائی میں ملزم کا ساتھی شریف اللہ ایک بیگ چھوڑ کر فرار ہوگیا۔گرفتار ملزم کے قبضے سے نائن ایم ایم پستول اور بینک سے لوٹی گئی رقم پانچ لاکھ روپے برآمد ہوئی جب کہ فرار ہونے والے ملزم کے پھینکے گئے بیگ سے نائن ایم ایم پستول اور دو لاکھ روپے برآمد ہوئے۔سی ٹی ڈی کے مطابق ملزم نے اپنے دوست شریف اللہ اور اختر حبیب کے ساتھ مل کر 24 جولائی کو ناظم آباد کے نجی بینک میں ڈکیتی کی تھی اور ملزمان کی شناخت سی سی ٹی وی فوٹیج کی مدد سے کی گئی۔