کینڈین خاتون ردا شہزاد کو شوہرنے قتل کراکر ڈکیتی مزاحمت کا رنگ دیا،ملزم گرفتار

گوجرانوالہ (نمائندہ خصوصی)تھانہ احمد نگرپولیس نے کینڈین خاتون ردا شہزادکے اندھے قتل میں ملوث  اسکے شوہر شہزاد سہیل کو گرفتارکرلیا۔ تفصیلات کے مطابق شاطر ملزم شہزاد سہیل نے پولیس کو درخواست دی کہ وہ اپنی بیوی مقتولہ ردا شہزاد،بچوں اور اپنے خالو نصیر احمدکے ہمراہ گھر آ رہا تھا کہ گل والہ کے قریب دو موٹر سائیکل سوار وں نے  اسکی بیوی کو مزاحمت پر گولیاں مار کر قتل کردیا۔ پولیس نے مقدمہ درج کر کے ملزموں کی تلاش شروع کر دی۔سی پی اوعمر سلامت نے ایس پی صدر ڈویژن محمد عثمان ٹیپو کی زیر قیادت،اے ایس پی وزیرآباداختر نوازکی زیر نگرانی ایس ایچ او سب انسپکٹرعدنان اعجازو دیگران پر مشتمل پولیس ٹیمیں تشکیل دیں۔ ٹیموں نے تفتیش کرتے ہوئے ملزموں نصیر احمد اور عنصر علی کو گرفتارکر لیا جبکہ مزید تفتیش پر انکشاف ہو ا کہ سفاک خاوندشہزاد سہیل نے ملزموں سے مل کر ہی اپنی بیوی کو قتل کراکر ڈکیتی کا ڈرامہ رچایا ۔ پولیس کو ملزم شہزاد سہیل نے بتایا کہ اس کااپنی بیوی سے پاکستان میں مستقل رہائش اختیار کرنے پر تنازعہ چلا آرہا تھا جبکہ اس کی بیوی پاکستان میں رہنے پر پر رضا مند نہ تھی۔جس کا اسے کافی رنج تھا۔سی پی او نے ملزمان کی گرفتاری پر ایس ایچ اواحمدنگرسب انسپکٹر عدنا ن اعجاز اور ان کی پولیس ٹیم کوشاباش دی۔