لاہور(سپورٹس رپورٹر)انٹرنیشنل کرکٹ کونسل نے کھلاڑیوں کی نئی رینکنگ جاری کردی۔آئی سی سی کی جانب سے تازہ ترین رینکنگ کے مطابق ٹیسٹ فارمیٹ میں نیوزی لینڈ کے کپتان کین ولیمسن ٹاپ پوزیشن سے محروم ہوگئے جبکہ انگلینڈ کے جو روٹ نے 872 ریٹنگ پوائنٹس کیساتھ پہلی پوزیشن پر قبضہ جمالیا۔کین ولیمسن 859 پوائنٹس کیساتھ دوسرے، بابراعظم ایک درجہ ترقی پاکر 768 پوائنٹس کیساتھ تیسرے جبکہ ڈیرل مچل چوتھے نمبر پر موجود ہیں۔ ون ڈے رینکنگ میں بابراعظم کی بادشاہی برقرار ہے، وہ 824 پوائنٹس کیساتھ پہلی پوزیشن پر قابض ہیں جبکہ بھارت کے شبمن گل دوسرے، کپتان روہت شرما ایک درجہ ترقی کے بعد تیسرے اور کوہلی تنزلی کیساتھ چوتھی پوزیشن پر آگئے ہیں۔بائولرز کی رینکنگ میں کوئی تبدیلی نہیں آئی ٹیسٹ میں روی ایشون پہلی، ون ڈے میں جنوبی افریقی سپنر کاشیومہاراج پہلی جبکہ ٹی20 میں عادل رشید کا پہلا نمبر پر برقرار ہے۔