پیرس اولمپکس یا میرج بیورو، گولڈ میڈل نے ایک اور جوڑا ملا دیا

لاہور(سپورٹس رپورٹر)پیرس اولمپکس میں دنیا بھر سے کھلاڑی میڈلز جیتنے آئے ہیں لیکن ایک اتھلیٹ گولڈ میڈل جیتنے کے بعد گرل فرینڈ کا دل جیتنے میں بھی کامیاب ہوگئے۔پیرس اولمپکس 2024 گیمز کے گیارھویں روز شائقین کھیل کو ایک حیران کن منظر دیکھنے کو ملا جب روئنگ ایونٹ میں طلائی تمغہ جیتنے والے امریکی راور جسٹن بیسٹ نے اس کامیابی کا جشن اپنی دوست کو شادی کی پیشکش کر کے منایا۔جسٹن بیسٹ نے گھٹنوں کے بل بیٹھنے کے بعد لینے اولیویا سے کہا کہ ’لینے! تم میری زندگی کی محبت ہو، مجھے معلوم تھا کہ تم خاص ہو ’ تم بے انتہا خوبصورت ہو، بہت عقلمند اور رحم دل، کوئی بھی شخص ایسا نہیں ہوسکتا جو تم سے محبت نہ کرے۔ لینے! کیا تم مجھ سے شادی کروگی؟لینے اولیویا کی خوشی سنبھالے سے نہ سنبھلی اور وہ فرط جذبات سے مغلوب ہو کر رونے لگیں مگر یہ خوشی کے آنسو تھے اور انہوں نے جسٹن کے پروپوزل کو قبول کرلیا۔