لاہور(نمائندہ سپورٹس) ہمدان پولو کپ برائے لاہور اوپن پولو چیمپئن شپ کا فائنل آج سامبا بینک اور اے او ایس پولو ٹیم کے درمیان ہوگا۔ شریک دس ٹیموں میں کئی غیرملکی کھلاڑیوں نے بھی اس ٹورنامنٹ میں حصہ لیا ہے۔ فائنل کھیلنے والی سامبا بینک کی ٹیم میں سید محمد تراب رضوی، المان جلیل اعظم، عدنان جلیل اعظم اور ایڈورڈ بینر ایو شامل ہیں جبکہ اے او ایس پولو ٹیم میں حمزہ علی حکیم، ہاشم کمال آغا، شاہ شمیل عالم اور راجہ سمیع اللہ شامل ہیں۔گزشتہ روز پانچویں اور چھٹی پوزیشن کا میچ باڑیز اور پلاٹینم ہومز /اولمپیاء کے درمیان ہوا جو باڑیز کی ٹیم نے 7-6 سے جیت لیا۔ باڑیز کی طرف سے ارینسٹو ٹروٹز نے چھ جبکہ آغا موسی نے ایک گول سکور کیا۔ ہارنے والی پلاٹینم ہومز /اولمپیاء کی طرف سے عامر رضا بہبودی نے تین، مصطفی منوں نے دو جبکہ احمد علی ٹوانہ نے ایک گول سکور کیا۔