ڈرامہ’ڈنک‘ کے پوسٹر پر بین ڈنک کا اداکار بلال عباس کو بال کٹوانے کا مشورہ

ملتان (سپورٹس ڈیسک) پاکستانی ڈرامہ ’ڈنک‘ کا پوسٹر نام سے مماثلت رکھنے کے باعث آسٹریلین وکٹ کیپر بلے باز بین ڈنک کی نگاہوں میں آگیا۔ ’ڈنک‘ ڈرامے کا پوسٹر حالیہ کچھ عرصے کے دوران مختلف سائٹس پر جاری کیا گیا اور اس کے مرکزی کردار اداکار بلال عباس نے بھی اپنے انسٹاگرام اکاؤنٹ پر ڈرامے کا پوسٹر شیئر کیا۔ڈرامے کا نام ڈنک ہونے کی وجہ سے سوشل میڈیا صارفین نے اسے غلطی سے پاکستان سپر لیگ (پی ایس ایل) کی ٹیم لاہور قلندرز کے آسٹریلین وکٹ کیپر بلے باز کو ٹیگ کرنا شروع کردیا۔ بین ڈنک نے انسٹاگرام پر جاری کردہ اپنی سٹوری میں ’ڈنک‘ ڈرامے کا پوسٹر شیئر کرکے بتایا کہ انہیں اس تصویر پر بہت بار ٹیگ کیا جاچکا ہے۔خیال رہے کہ ’ڈنک‘ نامی یہ ڈراما جلد نجی ٹی وی چینل پر نشر ہوگا جس میں اداکار بلال عباس خان اور ثناء جاوید مرکزی کرداروں میں دکھائی دیں گے۔