کراچی کے علاقے ایم اے جناح روڈ پرنامعلوم ملزمان نے فائرنگ کرکے تیس سالہ عامرشہزاد کو موت کے گھاٹ اتاردیا، پولیس کے مطابق مقتول پان فروش تھا جسے اپنی دکان کھولتے وقت قتل کیا گیا۔ قصبہ ڈھائی نمبرپرنامعلوم افراد نے فائرنگ کرکےصلاح الدین نامی شخص کو قتل کردیا۔ ادھرناگن چورنگی کے قریب فائرنگ سے ایک شخص جاں بحق ہوگیا، دوسری جانب اسٹیل ٹاؤن کے علاقے میں گشت پر موجود پولیس کی موبائل گاڑی حملہ کیا گیا جس سے ایک سب انسپکٹرمعمولی زخمی ہوا۔ جسے طبی امداد کے لیے ہسپتال منتقل کردیا گیا۔ دوسری جانب اورنگی ٹاؤن میں نامعلوم افراد کی جانب سے پولیس موبائل پردستی بم حملے کا مقدمہ تھانہ مومن آباد میں درج کرلیا گیا۔ ادھرایسٹ اورویسٹ زون پولیس نے شہرکے مختلف علاقوں میں جرائم پیشہ افراد کے خلاف کارروائی کرتے ہوئے ستاسی ملزمان کو گرفتار کرکے ان کے قبضے سے اسلحہ برآمد کرلیا، محمود آباد میں ایک بینک ڈکیتی میں ڈاکولاکھوں روپے لوٹ کرفرارہوگئے، مزاحمت پر بینک کے کیشئر کوزخمی کردیا گیا۔ ادھر گزشتہ دنوں نامعلوم افراد کی فائرنگ سے جاں بحق ہونے والے اے ایس آئی سید کامران رحمانی کی نماز جنازہ خواجہ اجمیر نگری پولیس زونل ہیڈ کوارٹرز میں ادا کرنے کے بعد مقامی قبرستان میں ان کی تدفین کردی گئی۔ دوسری جانب سی ائی ڈی پولیس نے شیرشاہ کے علاقے میں کارروائی کرتے ہوئے ٹارگٹ کلنگ میں ملوث ملزم جنید ٹی ٹی کو گرفتار کرکے اسلحہ برآمد کرلیا، ایس ایس پی سی آئی ڈی فیاض خان کے مطابق ملزم پچاس سے زائد قتل اور ڈکیتی کی وارداتوں میں پولیس کو مطلوب تھا۔