ڈیرہ غازی خان (نوائے وقت نیوز+ ثناء نیوز) ڈیرہ غازی خان کے علاقہ یارو کھوسہ میں پولیس اور جرائم پیشہ افراد کے درمیان فائرنگ کے تبادلہ میں ایس ایچ او سمیت چار پولیس اہلکار جاںبحق ہو گئے جبکہ مقابلہ میں ایک ڈاکو بھی مارا گیا۔ پولیس اور ڈاکوئوں کے درمیان یارو کھوسہ میں مقابلہ ہوا پولیس نے اشتہاریوں کی اطلاع پہ چھاپہ مارا تو فائرنگ کا تبادلہ ہو گیا۔ مقابلہ کے دوران چار پولیس اہلکار جن میں تھانہ کوٹ مبارک  کا ایس ایچ او بھی شامل ہے جاںبحق ہو گئے جبکہ ایک ڈاکو حیدر  موقع پر ہلاک  ہو گیا جبکہ باقی ڈاکو فرار ہونے  میں کامیاب ہو گئے۔ مقابلے میں 4 پولیس اہلکار زخمی بھی ہو گئے جنہیں ہسپتال منتقل کر دیا گیا ہے۔ جاںبحق اہلکاروں کی نماز جنازہ پولیس لائن میں ادا کی جائے گی۔ چھوٹو گینگ کے کارندے زخمی ساتھی کو لے کر فرار ہونے میں کامیاب ہو گئے جبکہ پولیس نے علاقے کو گھیرے میں لے کر سرچ آپریشن شروع کر دیا ہے۔ مقابلے کے باعث علاقے میں خوف و ہراس پھیل گیا۔