کامونکے: ٹائر کا آہنی کڑا اڑ کر لگنے سے سڑک پر کھڑے 2 بچوں سمیت 3 افراد جاں بحق

کامونکے + گوجرانوالہ (نامہ نگار + نمائندہ خصوصی) ڈمپر کے برقی تاروں سے ٹکرانے کے باعث ٹائر کا آہنی کڑا اتر کر سڑک کنارے کھڑے شہریوں کو لگنے سے دو بچوں سمیت تین افراد جاں بحق تین شدید زخمی ہوگئے۔ بتایا گیا کہ ریت لیکر آنے والے ڈمپر کے ڈرائیور نے ہائیڈرالک جیک سے ڈمپر کا عقبی حصہ اٹھایا جو اوپر سے گزرنے والے الیون کے وی تاروں سے چھو گیا جس سے ڈمپر کے ٹائروں کو آگ لگ گئی اس دوران ڈرائیور نے جیک بندکردیا ڈمپر تاروں سے الگ ہوگیا، اس دوران بجلی کے سپارک کی باعث کرنٹ ویل میں بھی آگیا ٹائر دھماکے سے پھٹ گیا۔ جس سے آہنی کڑا گولی کی رفتار سے نکلا اور نزدیک کھڑے آٹھ سالہ احمد رضا، سات سالہ اذان، سات سالہ عبداللہ، پینتیس سالہ گلفام، پینتالیس سالہ حسن شاہ اور بیس سالہ علی رضا شدید زخمی ہوگئے۔گلفام اور عبداللہ تحصیل ہیڈ کوارٹر ہسپتال میں اپنے خالق حقیقی سے جاملے جبکہ سات سالہ اذان علی ڈی ایچ کیو ہسپتال گوجرانوالہ جاتے ہوئے راستہ میں دم توڑ گیا، باقی تینوں زخمیوں کو تشویش ناک حالت کے پیش نظر لاہور اور گوجرانوالہ ہسپتالوں میں منتقل کردیا گیا۔ صدر پولیس نے ڈمپر کے ڈرائیور کو حراست میں لے لیا ہے۔ جاں بحق ہونے والوں کی نعشیں گھروں کو پہنچیں تو کہرام مچ گیا۔ بچوں کے والدین کا کہنا تھا کہ انکے بچے ہنسی خوشی سکول گئے اور چھٹی کے بعد بھوکے پیاسے موت کے منہ میں چلے گئے اور انکی نعشیں گھر پہنچ گئیں۔