قلات،منگچر میں نامعلوم افراد کی فائرنگ،3مزدور قتل، ایک زخمی 

 بلوچستان کے ضلع قلات کے علاقے میں نامعلوم افراد نے فائرنگ کرکے 3 مزدوروں کو قتل کردیا۔ پولیس کے مطابق حملے میں ایک مزدور زخمی بھی ہوا۔ فائرنگ کا واقعہ قلات کے علاقے کلی خراسانی منگچر کے قریب پیش آیا۔ لیویز حکام کا کہنا ہے کہ قتل کیے گئے مزدور بورنگ پر کام کر رہے تھے کہ حملہ آوروں نے ان پر فائرنگ کردی، جس سے وہ موقع پر ہی جاں بحق ہوگئے۔ لیویز حکام کا مزید کہنا ہے کہ فائرنگ کی وجہ سامنے نہ آسکی، تاہم واقعہ کی تفتیش شروع کردی گئی ہے۔ جاں بحق مزدوروں کی لاشوں کو ضروری کارروائی، جب کہ زخمی کو فوری طبی امداد کیلئے قلات کے اسپتال منتقل کردیا گیا ہے۔