ایوان بالا کا اجلاس چیئرمین سینٹ صادق سنجرانی کی دادی کی وفات کے باعث ڈپٹی چیئرمین مرزا محمد آفریدی کی زیرصدارت شروع ہوا۔ اجلاس کی کارروائی سے قبل تحریک انصاف کے سینیٹر اعجاز چودھری نے ڈپٹی چیئرمین سینٹ کے کہنے پر چیئرمین سینٹ صادق سنجرانی کی دادی، سینیٹر ثانیہ نشتر کی والدہ اور دہشت گردی واقعات میں جام شہادت نوش کرنے والے جوانوں کیلئے فاتحہ خوانی کرائی۔ قبل ازیں سینٹ میں اپوزیشن لیڈر سید یوسف رضا گیلانی کی زیر صدارت اپوزیشن کا اجلاس منعقد ہوا۔ اجلاس میں چیئرمین سینٹ کے رویے سے نالاں اپوزیشن کی جانب سے چیئرمین سینٹ صادق سنجرانی کے خلاف شکایت جمع کروانے کیلئے مسلم لیگ ن کے سینیٹر عرفان صدیقی اور پیپلز پارٹی کے سینیٹر تاج حیدر پر مشتمل دو رکنی کمیٹی تشکیل دے دی۔ قبل ازیں مائیک نہ ملنے پر سینیٹر فیصل جاوید ایوان سے چلے گئے۔ بعدازاں سینیٹر رخسانہ زبیری نے کورم کی نشاندہی کی، گنتی پر کورم پوار نہ ہوا۔ جس پر اجلاس آج دن دس بجے تک ملتوی کر دیا۔