کراچی (سٹاف رپورٹر) سابق صدر اور سابق آرمی چیف جنرل (ر) پرویز مشرف کی نماز جنازہ کراچی ملیر کینٹ  پولو گراؤنڈ میں ادا کردی گئی۔ اہل خانہ سمیت فوجی حکام، سیاسی اور سماجی شخصیات نے شرکت کی۔ نماز جنازہ میں چیئرمین جوائنٹ چیفس آف سٹاف کمیٹی جنرل ساحر شمشاد، سابق آرمی چیف جنرل ریٹائرڈ قمر جاوید باجوہ اور جنرل ریٹائرڈ اشفاق پرویز کیانی، ایم کیو ایم کے رہنما خالد مقبول، مصطفیٰ کمال، فاروق ستار اور فروغ نسیم سمیت دیگر بھی شریک ہوئے۔ بعد ازاں پرویز مشرف کی آرمی قبرستان میں فوجی اعزاز کے ساتھ تدفین کی گئی۔ خیال رہے کہ پانچ فروری کو سابق صدر جنرل (ر) پرویز مشرف دبئی میں انتقال کر گئے تھے۔  گزشتہ شب میت کو لیکر خصوصی طیارہ دبئی سے کراچی پہنچا تھا۔ خصوصی طیارے سے پرویز مشرف کی اہلیہ، بیٹی اور صاحبزادے بھی کراچی پہنچے تھے۔ سابق صدر جنرل (ر) پرویز مشرف کو مکمل اعزاز کے ساتھ کالا پل، چنیسر گوٹھ کے قریب واقع  فوجی قبرستان میں سپردخاک کردیا گیا۔ جنازے میں بیٹے بلال مشرف سمیت سابق جوائنٹ چیفس آف اسٹاف کمیٹی جنرل احسان الحق، سابق آرمی چیفس جنرل اسلم بیگ، وفاقی سیکرٹری سید انور محمود، امین الحق، فواد چوہدری، امیر مقام، عمران اسماعیل، سماجی شخصیت جاوید جبار، سابق چیئرمین ایف  شبر زیدی اور دیگر نے شرکت کی۔ قبل ازیں سابق صدر کا جسد خاکی پرواز ایم ایل ایم 567 کے ذریعے پاکستان پہنچایا گیا۔