لاہور(نامہ نگار)فیصل ٹاؤن کے علاقے میں ٹریفک پولیس نے نشے میں دھت ہوکر گاڑی چلانے والے 2ملزموں کو گرفتار کر کے ان کے قبضے سے اسلحہ برآمد کر لیا ہے۔ سٹی ٹریفک پولیس ترجمان کے مطابق ٹریفک انسپکٹر نعیم کمبوہ نے مشکوک کار کو روکنے کی کوشش کی، ملزمان نے گاڑی روکنے کے بجائے بھگا دی، تاہم تعاقب کے بعد انہیں پکڑ لیا گیا۔ کار میں سوار ملزم مون مسیح اور سنی مسیح دونوں نشے میں دھت تھے۔ملزمان کے قبضے سے پستول اور گولیاں بھی برآمد ہوئی ہیں۔دونوں ملزموں کو قانونی کارروائی کیلئے تھانہ فیصل ٹاؤن پولیس کے حوالے کر دیا گیا۔ چیف ٹریفک آفیسرمستنصر فیروز نے بہترین کارکردگی پر ٹریفک انسپکٹر نعیم کمبوہ کو تعریفی سند اور نقد انعام دینے کا اعلان کیا ہے۔