ویسٹ انڈیز کیخلاف ٹی ٹونٹی سیریز کا فاتحانہ آغاز کرینگے : ڈیوڈ وارنر

 لاہور(سپورٹس رپورٹر)آسٹریلوی کرکٹ ٹیم کے اوپننگ بیٹر ڈیوڈ وارنر نے کہا ہے کہ مہمان ویسٹ انڈین ٹیم کو پہلے ٹی ٹونٹی میچ میں شکست دیکر تین میچوں کی سیریز کا آغاز فاتحانہ انداز میں کریں گے۔ ویسٹ انڈیز ٹیم کیخلاف ان کی ٹیم نے ٹی ٹونٹی سیریز کیلئے بھرپور تیاری کی ہے۔ ویسٹ انڈیز ٹیم کیخلاف ون ڈے سیریز میں کلین سویپ فتح کے بعد ان کی ٹیم کے اعتماد میں اضافہ ہوا ہے۔ویسٹ انڈیز کی ٹیم ٹی ٹونٹی فارمیٹ میں اچھا پرفارم کرتی ہے اور اس کو شکست دینا آسان نہیں ہوگا تاہم ان کی ٹیم نے سیریز کے ابتدائی میچ سے قبل بھرپور تیاری کیساتھ حکمت عملی تیار کر رکھی ہے۔ ان کی ٹیم میں ایسے کھلاڑی موجود ہیں جو کسی بھی وقت میچ کا پانسہ پلٹنے کی صلاحیت رکھتے ہیں۔وہ کالی آندھی کیخلاف ابتدائی ٹی ٹونٹی میچ میں شاندار کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کریں گے۔ وہ مکمل طور پر فٹ ہیں اور مہمان ٹیم کیخلاف تین ٹی ٹونٹی میچوں کی سیریز کے پہلے میچ میں شرکت کیلئے بے تاب ہیں۔ انہوں نے ٹیم کو خبردار کرتے ہوئے کہا کہ ویسٹ انڈیز کیخلاف سیریز میں کامیابی کیلئے ٹیم کو تینوں شعبوں میں سو فیصد کارکردگی کا مظاہرہ کرنا ہوگا۔ تین ٹی ٹونٹی میچوں کی سیریز کا آغازکل 9 فروری سے ہوبارٹ میں ہوگا۔