ٹی 20 بگ بیش لیگ، سڈنی سکسرز نے برسبین ہیٹ کو 5 وکٹوں سے ہرا دیا

برسبین (اے پی پی) ٹی 20 بگ بیش لیگ میں سڈنی سکسرز نے برسبین ہیٹ کو 5 وکٹوں سے شکست دے دی، فاتح ٹیم نے 128 رنز کا ہدف 19 اوورز میں حاصل کر لیا، مائیکل لمب نے 61 رنز کی ناقابل شکست اننگز کھیلی، انہیں مین آف دی میچ کا ایوارڈ دیا گیا۔ پیر کو برسبین کرکٹ گراﺅنڈ میں کھیلے گئے میچ میں برسبین ہیٹ کے کپتان جیمز ہوپس نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 127 رنز بنائے، لوک پومرزبیک نے 37 اور جو برنز نے 27 رنز بنائے۔ سٹیو اوکیف اور جوش ہیزلووڈ نے تین، تین جبکہ لوک فیلڈمین نے دو وکٹیں حاصل کیں۔ جواب میں سڈنی سکسرز نے ہدف 19 اوورز میں 5 وکٹوں کے نقصان پر حاصل کر لیا۔ مائیکل لمب نے ایک چھکے اور پانچ چوکوں کی مدد سے 55 گیندوں پر 61 رنز کی ناقابل شکست اننگز کھیلی۔ انہیں مین آف دی میچ کا ایوارڈ دیا گیا۔ بین کٹنگ اور ڈینیئل کرسچن نے دو دو وکٹیں حاصل کیں۔