کراچی (نیوز رپورٹر) کراچی کے علاقے شیرشاہ پراچہ چوک کے قریب نالے میں گیس بھر جانے سے دھماکے کا ایک اور واقعہ پیش آگیا۔ علاقے میں تجاوزات کے خلاف جاری آپریشن کے دوران بلال ہوٹل کے قریب نالے میں گیس بھر جانے سے زوردار دھماکا ہوا۔ دھماکے میں ایک گھر کی دیوار گر گئی اور کچھ گھروں کی دیواروں پر دراڑیں پڑ گئیں۔ دھماکانالے پر قائم رہائشی علاقے میں ہوا جہاں ہوٹل اورگھر تعمیر تھے۔پولیس کے مطابق جمعہ کی سہہ پہر تقریبا پونے 5 بجے شیرشاہ کے علاقے پراچہ چوک میں دھماکا ہوا۔ پولیس نے بتایا ہے کہ دھماکا بینک کے عقب میں ٹوٹی ہوئی دکانوں میں ہوا۔ ڈی سی کیماڑی مختار ابڑو نے تازہ صورتحال بتاتے ہوئے کہا کہ دھماکا نالے میں گیس بھرنے کے باعث ہوا، اس مقام پر تین غیر قانونی دکانیں تعمیر تھیں جنہیں مسمار کردیا گیا تاہم نالے پر فرش اب بھی موجود تھا، واقعے میں کوئی جانی نقصان نہیں ہوا۔ واضح رہے کہ اس سے قبل 18 دسمبر 2021 کو شیرشاہ پراچہ چوک پر واقع اسی نالے میں دھماکے سے نجی بینک کی عمارت اور قریبی دکانوں کو شدید نقصان پہنچا تھا جس کے نتیجے میں 18 افراد جاں بحق ہوگئے تھے جس میں رکن قومی اسمبلی عالمگیر خان کے والد بھی شامل تھے۔