عالمی شہرت یافتہ ویٹرنری  ڈاکٹر عنایت اللہ کاٹھیو امریکا میں انتقال کر گئے

ٹنڈوجام(پ ر) عالمی شہرت یافتہ ویٹرنری ماہر و سندھ زرعی یونیورسٹی کے المنائی ڈاکٹر عنایت اللہ کاٹھیو امریکا میں انتقال کر گئے، اس موقع پرسندھ زرعی یونیورسٹی کے وائس چانسلر نے اظہار افسوس کرتے ہوئے کہا کہ عالمی شہرت یافتہ پاکستانی نژاد، امریکا میں مقیم  وٹرینری ماہر و سندھ زرعی یونیورسٹی کے گریجوئیٹ ڈاکٹر عنایت اللہ کاٹھیو69 برس کی عمر میں دل کے عارضے کی وجہ سے امریکا میں انتقال کر گئے ہیں،جس  کی خبر ملتے ہی سندھ سمیت ملک بھر کی ویٹرنری کمیونٹی میں دکھ کی لہر دوڑ گئی ہے۔اطلاعات کے مطابق ڈاکٹر کاٹھیو8 ستمبر1953کو ضلع لاڑکانہ کے شہر نصیر آباد میں پیدا ہوئے، انہوں نے1978میں زرعی یونیورسٹی کی فیکلٹی آف اینیمل ہسبنڈری اینڈ ویٹرنری سائنسز سے ڈی وی ایم کی ڈگری مکمل کی،1981میں وہ فیلوشپ کے لیے واشنگٹن کی جارج ٹائون یونیورسٹی مسوری،کولمبیا و آئیووا یونیورسٹی سے پی ایچ ڈی و پوسٹ ڈاکٹریٹ کی۔ اپنے کیریئر کے دوران انہوں نے حکومت سندھ میں بطور ویٹرنرینFAO میں بطور ریسرچ آفیسر و اقوام متحدہ کے ترقیاتی پروگرام میں کنسلٹنٹ کے طور پر اپنی خدمات انجام دیں۔ سندھ زرعی یونیورسٹی ٹنڈوجام کے وائس چانسلر ڈاکٹر فتح مری نے ڈاکٹر عنایت اللہ کاٹھیو کے انتقال کو ویٹرنری کی دنیا کے لیے ایک بڑا نقصان قرار دیتے ہوئے کہا کہ ڈاکٹر کاٹھیو امریکا میں ہونے کے باوجود سندھ سمیت ملک کے لیے عظیم خدمات انجام دیتے رہے۔