کراچی (نیٹ نیوز) سندھ پولیس نے کہا ہے کہ گزشتہ سال مختلف آپریشنز میں 26ہزار 914 ملزموں کو گرفتار کیا گیا اور 3ہزار 158 مقابلوں میں 289 مشتبہ افراد مارے گئے۔ ان مقابلوں کے دوران صوبے بھر میں مجموعی طور پر 1ہزار 726 جرائم پیشہ گروہوں اور گینگز کو ختم کیا گیا۔ گزشتہ سال صوبائی پولیس نے مجموعی طور پر 26ہزار 914 ملزموں کو گرفتار کیا جن میں دہشت گرد، ٹارگٹ کلرز، نوٹیفائیڈ ڈاکو، ہائی وے ڈکیت، اغوا کار اور اشتہاری شامل ہیں۔ ترجمان نے بتایا کہ ملزمان کے قبضے سے بھاری مقدار میں دھماکا خیز مواد، اسلحہ اور گولہ بارود بھی برآمد کیا گیا۔